බිංදු බෝත‍ලේගම කියන නමටත් වඩා බොහෝ දෙනා ඔහුව හඳුනන්නේ රූපයෙන්ලූ. හැබැයි ඒ පෙනුම නිසාම ජීවිතේ ගැටලු ගොන්නකට මුහුණ දෙන්න මේ බිංදුට සිද්ධ වෙලා. මේ බිංදු සමග කළ කතාබහක්. බිංදු කියන්නද? ලෝකල් බන්දු කියන්නද? බිංදු කියලා කියන්න. මගේ ඇත්ත නම බෝත‍ලේගම රණවක ආරච්චිගේ ජනක කුමාර. පුංචි කා‍ලේ පටන් ගමේ අය කිව්වේ ජනක කියලා. සමහරු මට බන්දු කියලා කියන්නේ මගේ පෙනුම බන්දු සමරසිංහ වගේ නිසා. ඒත් මම ඒ හැමෝටම කියන්නේ මට බන්දු නොකියා බිංදු කියන්න කියලයි. මොකද මම මමනේ
මොනවද පුංචි කා‍ලේ විස්තර? මම ඉපදුණේ ඇඹිලිපිටියේ සෙවණගල ගමේ. පුංචිකා‍ලේවත් මම රඟපාලා තිබුණේ නැහැ. ඉස්කෝ‍ලේ සෞන්දර්ය විෂයට පවා කළේ චිත්‍ර විෂය එහෙම කිව්වට ඉතිං ලොකු චිත්‍ර ශිල්පියෙක් නමෛයි. සාමාන්‍ය කොල්ලෙක්.
ජනක බන්දු වගෙයි කියලා කවුද මුලින්ම කිව්වේ? යාළුවො තමයි.
බිංදුගේ පෙනුම බන්දු වගේ වෙන්න දත නැති එකත් බලපෑවා නේද? දත මම හිතා මතා ගැලෙව්වා නමෛයි. ඒක වුණේ මෙහෙමයි. ඇඹිලිපිටියේ අපේ ගමේ ටැප් තිබුණේ නැහැ. කොල්ලො රංචුව එක්ක ගිහින් වලවේ ගඟේ පීනලා සතුටින් ඉඳපු ළමා කාලයක් මට තිබුණේ. ගඟේ නාන්න ගිහින් ගලක වැදිලා දතේ ස්නායු මැරුණා.
ටික කාලයක් යද්දී දත ළඟ විෂබිජ එකතුවෙලා ලොකු ප්‍රශ්න ඇතිවෙනකොට වෛද්‍යවරු කිව්වා දත ගලවන්න කියලා. අවුරුදු 23-24 වෙනකොට මට දත ගැන ආසාව අත ඇරගන්න වුණේ ඒ නිසා.
බන්දු සමරසිංහ කියන ප්‍රවීණයාව මුල්වරට දැකපු දවස මතකද? ඔව්. මම කොළඹට ආපු මුල මහරගම පාරෙදි බන්දු සමරසිංහ මහත්තයාව දැක්කා. දැකපු ගමන් ගිහිල්ලා කතා කරන්න ආස හිතුනට මට බය හිතුණා මොකද එයා ප්‍රවීණයෙක්. කවුරුවුණත් ප්‍රවීණයන්ට මම ගරු කරනවා.
ඊළට බන්දුව දැක්කේ කොහෙදීද? උසාවියේදී තමයි. මට එයාව අනුකරණය කිරීම ගැන චෝදනාවක් එල්ල වෙලා තියෙනවානේ.
පෙනුමෙන් බංදුගේ පිටපතක් වීම ගැන ඇත්තටම බිංදුට මොකද හිතෙන්නේ? ලෝකේ එක වගේ හත් දෙනෙක් ඉන්නවයි කියනවනේ. එයා කියනවා නම් මම එයා වගෙයි කියලා මම කියනවා එයා මම වගෙයි කියලා. මම අදහනවා දෙන්නටම හානියක් නොවෙන සාධාරණ දෙයක් දෙවියෝ කරාවි කියලා. හැමෝටම තමන්ගේ හැකියාවට ලැබෙන දෙයක් ලැබෙයි. මේ ලෝකේ දෙවියෝ බුදුන් ඉන්න බව මම අදහනවා.
බිංදු කියන්නේ හැබෑ ජීවිතේදී මොනවගේ කෙනෙක්ද? සතුටින් සැහැල්ලුවෙන් ඉන්න ගමේ කොල්ලෙක්.
පුද්ගලික ජීවිතේ විස්තර කියමු? මට ඉන්නේ අම්මයි, අයියයි. මල්ලිලා දෙන්නයි. අපේ අයියා විතරක් විවාහකයි. මමයි, මල්ලිලා දෙන්නයි නම් තාම තනිකඩයෝ
තනිකඩව හිටියා දැන් ඇති කියලා කවුරුවත් කියන්නෙ නැද්ද? මොකද නොකියන්නේ රටේ ලෝකේ හැමෝ ම කියන්නේ මට දැන් කසාද බඳින්න කියලයි. ඒත් එහෙම එක පාර කසාද බඳින්න බැහැ.
මම අවුරුදු 29ක කොල්ලෙක්. ස්ථාවරයක් හදාගන්නෙ නැතුව ගෑනු ළමයෙක්ගේ වගකීම කරට ගන්න බෑ.
විවාහය ගැන ඔහොම කතා කරන්නේ බිංදුගේ ජනප්‍රියකම අඩුවේවි කියලද? අනේ නැහැ. මම පුද්ගලික ජීවිතේ දී මොනවා කළත් කලාවේ ජනප්‍රියතාව නම් අඩුවක් වෙන එකක් නැහැ. ඒ නිසා ඇත්තමයි මම කියන්නෙ.
ඉදිරිය ගැන තියෙන බලා‍පොරොත්තු මොනවද? ඉදිරියේදී මේ ජීවත්වුණු විදියටම සතුටින් හොඳින් ඉන්න බලා‍පොරොත්තු වෙනවා නඩු හබ නිසා මම වැඩියෙනුත් එක්ක ප්‍රසිද්ධ වුණා. ඒනිසා කොහොමත් දැන් ආපහු ගමට ගිහින් කුලී වැඩක්, මේසන් වැඩක් කරන්න පටන්ගන්න බැහැ. මොකද මාව මිනිස්සු අඳුනනවා. නළුවා මේසන් වැඩ කරනවා බලන්න ගමට ඒවි. කොහොමටත් දැන් කලාව රහවැටුණු එකේ මේ පාරෙම ඉදිරියට යනවා.
0 comments:
Post a Comment